Абдилда Тажибаев. Олендер. 1957-1976

КЕЛE ҒОЙ КӨКТЕМІМ

Келе ғой, көктемім, аңсаған,

Тазартшы, ызғардан аспанды.

Сен ғана әндерді бастаған,

Сен ғана бастаушы дастанды.

Жасартшы, жапырағын орманның,

Сайратшы, жырлампаз құстарын.

Көрейін қанатын арманның,

Көрейін әндетіп ұшқанын.

Жан берші мұз басқан өзенге,

Тыңдайын оның да жақсы әнін.

Селдетіп тағы бір жөнелсін

Бітпеген былтырғы дастанын.

Құтқаршы, қыстайғы тамұқтан,

Жылытшы, қойшының денесін.

Жазылсын тамағы қарлыққан,

Жып-жылы сары уыз жегесін.

Шықсын да жадырап жайлауға,

Қайтадан әнін бір бастасын.

Мұршам жоқ, айтуға, ойлауға

Қойшының күнінен басқасын.